BUTUAN CITY – Gidid-an na pagsulod sa White House ang mga tigbalita gikan sa Politico, CNN ug MS NOW human ipahibalo ni United States President Donald Trump nga iyang i-ban ang maong mga media outlet sa presidential complex.
Sumala sa MS NOW, usa ka reporter ug photographer gikan sa ilang network ang misulay pagsulod sa White House grounds apan wala ma-scan ang ilang mga press badge.
Gikuha usab kini sa usa ka opisyal ug wala sila tugoti nga makasulod.
Samtang, gikumpirma usab sa CNN ug Politico nga ilang mga reporter wala tugoti nga makasulod sa White House ug gikuha usab ang ilang mga press badge.
Ang maong lakang misunod sa pahayag ni Trump niadtong Biyernes diin iyang giingon nga dili na niya tugotan ang mga mamamahayag gikan sa tulo ka dagkong media outlet nga makasulod sa White House.
Gipasanginlan ni Trump ang Politico, CNN ug MS NOW sa pagmantala kuno og mga impormasyon nga iyang gihulagway nga “fiction o lies” bahin sa iyang administrasyon.
Apan ang maong mga media outlet mipadayon sa ilang pag-report bahin sa administrasyon ug sa mga kalihokan sa White House.
Ang insidente nakapukaw usab og mga pangutana bahin sa access sa media sa presidential complex ug sa relasyon tali sa administrasyon ug sa independent press.
Importante ang White House press access tungod kay pinaagi niini adunay higayon ang mga reporter nga direktang makapangutana sa presidente ug sa mga opisyal sa administrasyon, ug makahatag og impormasyon sa publiko bahin sa mga polisiya, desisyon ug kalihokan sa gobyerno.
Tungod niini, ang pagdili sa access sa pipila ka media outlet nahimong sentro sa diskusyon bahin sa press freedom ug sa papel sa media sa pagmonitor ug paghatag og impormasyon ngadto sa publiko.
