BUTUAN CITY – Gipahibalo ni Finance Secretary Frederick Go nga iya nang gipirmahan ang resolusyon nga magtangtang sa buhis sa Liquefied Petroleum Gas (LPG) ug kerosene.
Gipahibalo kini sa kalihim atol sa 2027 budget hearing sa Senado human gipangayo ni Senador Bong Go nga suspindihon na ang fuel excise tax tungod sa nagpadayong gubat sa Middle East.
Apan, gipatin-aw sa Department of Finance nga dili nila tangtangon ang excise tax sa diesel ug gasolina kay mahimong muresulta kini sa pagkawala sa P12 bilyones nga kita sa gobyerno matag-bulan.
Dugang pa ni Secretary Go, kung tangtangon ang buhis sa gasolina ug diesel, ang mga adunahan ang mas makabenepisyo tungod kay sila ang mas daghang gigamit nga diesel ug gasolina.
Imbis nga tangtangon ang buhis, ang gobyerno maghatag na lang og subsidiya sa mga vulnerable o mas nanginahanglan nga sektor samtang nagkataas ang presyo sa lana sa nasod.
