BUTUAN CITY – Aron maputol ang dugay nang kakulang sa komunikasyon ug serbisyo sa mga hilit nga lugar, gipakatap sa Cagayan de Oro City Police Office ang ilang mga personnel sa lima ka Geographically Isolated and Disadvantaged Areas o GIDA.
Lakip sa mga lugar nga gi-atim sa kapulisan ang mga barangay sa Tuburan, Besigan, Dansolihon, Taglima ug Tagpangi.
Sigon ni Police Major Emilita Simon, spokesperson sa kapulisan sa siyudad, usa sa mga hinungdan sa panagbangi tali sa mga residente ug gobyerno mao ang kakulang sa hustong impormasyon ug kahibalo sa mga lumulupyo sa maong mga lugar.
Tungod niini, gipakatap ang mga pulis pinaagi sa Revitalized Pulis sa Barangay Program aron masiguro nga matag-adlaw maabot ang serbisyo sa gobyerno ug mapanalipdan ang mga pamilya sa hilit nga komunidad.
Gipasiguro usab sa kapulisan nga mas paspas na nilang maabtan ang maong mga barangay aron matubag dayon ang bisan unsang insidente sa krimen ug uban pang krisis.
