BUTUAN CITY – Magpahigayon ang Eastern Mindanao Command kon EastMinCom og Exercise Surigao Sentinel 2026 gikan Oktubre 22 hangtod 25, sa Surigao Strait nga sakop sa Surigao City ug sa probinsya sa Dinagat Islands uban sa suporta sa lokal nga kagamhanan sa maong mga local government units.
Sa eksklusibong pakighinabi sa Bombo Radyo Butuan, gipadayag ni command spokesperson Col. Rosa Maria Cristina Rosete-Manuel, nga ang upat ka adlaw nga kalihukan, maghi-usa ang mga yunit sa militar, nagkada-iyang ahensiya sa gobyerno, lokal nga panggamhanan, mga reservists, disaster responders, partner stakeholders ug mga komunidad aron pasidunggan ang kaisog ug sakripisyo sa mga nakig-away ug nanalipod sa katubigan sa nasud atol sa makasaysayang Battle of Surigao Strait.
Tumong usab sa maong kalihokan nga palig-onon ang ka-andam sa operasyon sa militar ug mga kaubang ahensiya, pa-uswagon ang koordinasyon ug inter-operability sa mga nagkada-iyang grupo, ug mapalambo ang ka-andam sa paghatag og tabang sa mga nanginahanglan ug pagtubag sa mga kalamidad.
Dugang pa niini, gitinguha sa ehersisyo nga mapauswag ang paghatag og serbisyo publiko ug mapalig-on ang kalig-on ug kapasidad sa mga komunidad sa pag-atubang sa nagkadaiyang emerhensiya ug kalamidad.
