BUTUAN CITY – Gipangutana ni Senator-Judge Joel Villanueva si kanhi Chief Justice Artemio Panganiban kung mahimo pa bang mobotar o mulambigit sa Senate proceedings ang usa ka senador nga legal nga nadetine o nabilanggo.
Atol sa iyang pagpakita isip amicus curiae o tighatag og legal nga panglantaw sa Senate impeachment court, gikwestiyon si Panganiban kung makatarunganon ba nga tugotan ang mga senador nga wala makatambong sa proceedings nga mobotar kung guilty o inosente ni Vice President Sara Duterte.
Sa kasamtangang set-up diin 24 ka senador ang milangkob sa Senado isip impeachment court, kasagarang gihubad nga two-third sa maong ihap mao ang 16 ka boto.
Apan gikuwestiyon karon sa impeachment court kung magpabilin ba ang 16 ka boto bisan adunay mga senator-judges nga dili aktibong makaapil sa proceedings.
Sigon ni Panganiban, importante ang aktibong partisipasyon sa impeachment proceedings aron ang usa ka senator-judge makasusi mismo sa mga dokumento, makadungog sa testimonya sa mga testigo ug makakita sa ilang taras samtang naghatag og pamahayag.
Apil sa iyang gikuwestiyon ang mga senador nga anaa sa gawas sa nasud, nagtago, legal nga nadetine, nasakit, naospital o adunay laing rason nga dili makatambong sa proceedings.
Sumala ni Panganiban, kung wala sila mismo makasusi sa mga ebidensya ug makadungog sa mga testigo, mahimong pangutan-on kung patas ba nga tugotan gihapon sila nga mobotar sa maong kaso.
Gitin-aw usab sa maong diskusyon may kalabotan sa constitutional requirement nga kinahanglan ang two-thirds sa tanang miyembro sa Senado aron ma-convict ang usa ka impeachable official.
Sa pagkakaron, upat ka senador ang wala aktibong makaapil sa impeachment proceedings—sila sila Jinggoy Estrada ug Rodante Marcoleta nga detained, Ronald “Bato” dela Rosa nga wala motunga, ug Loren Legarda nga anaa sa dugay nga medical leave. Kini ang hinungdan nga gihangyo sa impeachment court ang mga retiradong mahistrado sa Korte Suprema, lakip si Panganiban, nga mohatag og legal nga panglantaw sa isyu sa voting threshold.
