BUTUAN CITY – Personal nga mitunga si kanhi Pangulong Rodrigo Duterte atubangan sa International Criminal Court o ICC Trial Chamber III kaganinang alas-singko sa hapon ning adlaw’ng Miyerkules, atol sa ikatulong status conference sa iyang kaso nga may kalabotan sa crimes against humanity.
Kini ang unang higayon nga personal nga mitunga si Duterte atubangan sa tribunal sukad sa iyang pagkasikop niadtong Marso 2025.
Nagsul-ob si Duterte og itom nga suit ug puti nga polo nga walay kurbata. Sa pagsugod sa hearing, makita siyang naglingkod samtang gisuportahan sa iyang mga kamot ang iyang suwang.
Gipamatud-an ni Judge Joanna Korner ang personal nga pagtunga ni Duterte sa korte sa unang higayon.
Matod niya, gawasnon si Duterte nga mobiya sa korte bisan kanus-a ug dili na kinahanglan mangayo og permiso sa mga huwes.
Padayon usab nga gipanghimakak sa kampo ni Duterte ang iyang kapasidad sa pag-atubang sa trial tungod kay sigon sa iyang mga abogado, adunay mga kabalaka sa iyang panglawas tungod sa iyang edad, ilabina sa gika-ingong problema sa iyang memorya.
Sa wala pa ang personal niyang pagtunga niining adlawa, ang kataposang higayon nga nakita si Duterte sa mga huwes mao niadtong Marso 14, 2025, dihang mitambong siya sa proceedings pinaagi lamang sa videoconference.
Nag-unang gohisgutan sa ikatulong status conference ang kaso sa prosecution batok kang Duterte, lakip ang listahan sa mga testigo, ebidensiya, mga dokumentong gipadayag ngadto sa depensa, uban pang posibleng insidente, ug ang oras nga igahin sa prosecution sa pagpresentar sa ilang kaso.
Gihisgutan usab ang timetable alang sa aktuwal nga trial, nga gikatakdang magsugod sa Nobyembre 30.
Lakip usab sa agenda ang proposal nga adunay mga “blocks of hearings” o sunod-sunod nga hearing nga adunay mga pahulay, ingon man ang gitakdang oras sa matag pagdungog.
Si Duterte nag-atubang og tulo ka kaso sa crimes against humanity nga may kalabotan sa iyang administrasyon ug sa kampanya batok ilegal nga droga.
Base sa rekord sa gobyerno, kapin 6,000 matud pa ka mga tawo ang namatay sa drug war, samtang mas taas pa ang ihap nga gibanabana sa mga human rights groups, nga miabot sa kapin 30,000, lakip ang mga bata.
