BUTUAN CITY – Gikumpirma sa Butuan City Agriculture and Veterinary Department nga dul-an sa 25-porsiento na sa 8,500-ektaryang basakan nga gitamnan og humay, mais ug lagutmon, ang nadamyos sa grabeng huwaw.
Sa eksklusibong pakighinabi sa Bombo Radyo Butuan, gipadayag ni city agriculturist Engr Pierre Anthony Joven nga base sa ilang pinaka-ulahing damage report niadtong wala pa gi-ulan ang siyudad, ang maong porsiento, bugti sa 2,100-ektaryang nadamyos na.
Naka-apekto matud pa kini sa 30-porsiento sa mga mag-uuma ning siyudad kon bugti sa 1,800 ka mga mag-uuma kondiin mi-abot sa 76-milyunes pisos ang ilang natalang damyos.
Ang pinakadakong umahan nga nadamyos sa grabeng huwaw natala sa Brgy Los Angeles, Sumilijon ug Baobaoan tungod sa pagminos sa supply sa tubig nga gikan sa irrigation system sa Cabadbaran City sa rasong anaa na sila sa tumoy’ng bahin sa maong sistema sa patubig.
Ang wala matud pa mitala og dakong damyos mao kadtong duol sa irrigation system ug kadtong duol sa Agusan River.
Gidugang pa ni Engr Joven nga apektado usab sa huwaw ang produksyon sa Agri-BOOST project tungod kay mikunhod man og 46-porsiento ang produksyon sa mga gulay, base na sa datus gikan sa Agri-Hub.
Gipadayag pa sa opisyal nga adiser ang pag-igo sa huwaw, nakapang-apod apod na sila og climate resilient production support sama sa mga plastic drums ug irrigation pipes alang sa mga mag-uuma.
Kini gawas pa sa gi-preposition nilang mga similya sa mga gulay rason nalikayan ang posibleng mas dako unyang damyos sa ilang mga gulayan.
