BUTUAN CITY- Nanawagan si Atty. Mary Helen Polinar Zafra, usa ka litigation lawyer, sa mas hugot nga transparency ug patas nga bidding sa mga proyekto sa Department of Public Works and Highways kon DPWH alang sa 2027, ilabina sa Surigao del Sur 1st District, nga girepresentahan ni Romeo Salazar Momo Sr.
Gipadayag usab ni Zafra nga nagsumite na kini og mga letter ngadto sa Office of the Ombudsman, kang President Ferdinand Marcos Jr., DPWH Central Office, DPWH-Caraga 1st District Engineering Office, ug mga may kalabotang ahensiya aron ipahibalo ang mga kabalaka kalabot sa posibleng conflict of interest ug mga iregularidad sa paghatag og mga kontrata.
Sigon niini, human sa pagsang-at niini og reklamo sa Ombudsman bahin sa giingong conflict of interest, plunder, graft, ug corruption, wala na matud pay gihatag nga mga kontrata sa Surigao La Swerte Corporation kon SLSC, nga giingong gipanag-iya ni Momo Sr. ug sa iyang pamilya, ingon man sa J&A Construction nga nalambigit kang kanhi kongresista ug karon gobernador Johnny Pimentel, alang sa 2025 ug 2026.
Bisan pa niini, nagpasidaan usab si Zafra nga adunay mga bag-ong kompanya sa konstruksyon nga posibleng gigamit sa pipila ka politiko aron makasalmot gihapon sa mga proyekto, lakip ang mga kompanyang anaa ubos sa iyang imbestigasyon.
Tungod niini, giawhag sa abogada ang mga abogado, katawhan, ug ubang mga Pilipino nga nahigugma sa nasud nga motambong ug mosubay sa mga proseso sa bidding aron masiguro ang pagkamatinud-anon sa mga dokumento, lisensiya, ug paghatag sa mga kontrata, ug malikayan ang posibleng pabor-pabor ug korapsyon sa paggamit sa pondo sa gobyerno.
