BUTUAN CITY- Gi-insistar sa kampo ni Vice President Sara Duterte nga kinahanglang respitohon sa Quezon City Regional Trial Court ang mahimong desisyon sa Korte Suprema kalabot sa ilang gipasakang petisyon.
Sumala ni Atty. Paul Lawrence Lim, abogado sa Bise Presidente, ugaling hatagan sa Supreme Court ang ilang hangyo, kinahanglan matud pa kining respituhon sa maong korte.
Sa petisyong gipasak sa bise presidente, gihangyo niini sa Korte Suprema nga mag-isyu kini og Temporary Restraining Order aron mapugngan ang pag-uswag sa kaso ug mapawalay bili ang impormasyong gipsaka sa Department of Justice.
Bisan paman mipasaka og ‘Urgent Motion to Resolve’ ang akusadong si Vice President Sara Duterte, sa kasamtangan wala gihapot resolusyon ug padayon nga nag-ung-ung sa Supreme Court.
Samtang wala pay gipagawas nga desisyon ang korte, sigon ni Atty. Lim, anaa sa Regional Trial Court na ang desisyon kung ipadayon ang pagbasa sa sakdal sa akusado.
Mingbalibad nga ipa-ambit na usab sa abogado ang partikular nga ‘grounds’ sa gipasaka niini nga petisyon sa Korte Suprema tungod sa gisunod matud pa nga ‘sub judice rule’.
Bisan paman, ang petisyon matud pa tumong nga kwestyonon ang hurisdiksyon sa Quezon City Regional Trial Court sa pagkupot niini sa mga kasong gipasaka batok sa bise presidente.
Gibarogan sa kampo niini nga dili pa pwedeng pasakaan og kaso ang akusado tungod adunay gitawag nga ‘limited procedural immunity’ ang usa ka ‘impeachable officer’.
Kahinumduman niadtong Biyerne, October 9, 2026 gikansela una sa Quezon City Regional Trial Court Br. 98 ang pagbasa sa sakdal kang Vice President Sara Duterte tungod sa naka-ung-ung nga mosyon ug petisyon sa kampo niini.
Nag-atubang sa 3 counts sa kasong ‘grave threats’ ang bise presidente may kalabotan sa pagpanghulga sa kinabuhi nila Pres. Ferdinand ‘Bongbong’ Marcos Jr, first lady Liza Araneta-Marcos, ug kanhi House Speaker Martin Romualdez.
