BUTUAN CITY – Mipalag si Alliance of Concerned Teachers kon ACT Teachers Party-list Representative Antonio Tinio kalabot sa gika-ingong kakulang sa aksyon sa administrasyong Marcos batok sa padayong epekto sa transboundary haze pollution o aso ug polusyon nga gikan sa mga sunog sa silingang nasod.
Atol sa deliberasyon sa proposed budget sa Department of Environment and Natural Resources o DENR, gitandi ni Tinio ang paspas nga pakig-coordinate sa Malaysia ngadto sa Indonesia, samtang iyang gikuwestyon ang kawala’y susamang high-level response gikan sa Malacañang.
Matod ni Tinio, daw gitugotan lamang sa gobyerno ang publiko nga magsul-ob og mask o magsuspenso og klase, imbes nga maghimo og konkretong mga lakang aron mapanalipdan ang mga katawhan batok sa peligroso nga polusyon.
Una nang naapektuhan sa baga nga aso gikan sa mga sunog sa isla sa Borneo sa Indonesia ang mga silingang nasod lakip ang Malaysia, Singapore ug Pilipinas.
Base sa mga taho, hapit na moabot sa 300,000 ka ektarya sa yuta ang nasunog sa Indonesia karong tuiga, nga miresulta sa taas nga lebel sa carbon emissions sukad sa ulahing bahin sa Hulyo.
Samtang, nagpasidaan ang Department of Environment and Natural Resources kon DENR batok sa taas nga lebel sa haze sa pipila ka lugar sa nasod. Gitambagan usab niini ang publiko nga limitahan ang mga kalihokan sa gawas aron malikayan ang mga sakit nga may kalabotan sa respiratory system.
