BUTUAN CITY- Mangayo og interbensyon ang Department of the Interior and Local Government (DILG) gikan sa Supreme Court ug Kongreso aron pakusgan ang mga lakang batok sa mga insidente sa pagpamusil sa mga tunghaan human sa natigayon sa Banga National High School sa South Cotabato.
Sumala ni DILG Secretary Jonvic Remulla, gusto niining tugotan sa Korte Suprema ang Philippine National Police (PNP) nga mopahigayon og inspeksyon sa mga panimalay og mga kwalipikadong nanag-iya og pusil aron masiguro ang husto nga pagtipig sa mga armas.
Gipadayag usab sa Secretary nga sa tulo ka insidente sa school shooting karung tuiga, mga rehistradong pusil nga gipanag-iyahan sa mga personnahe sa gobyerno ang gigamit, mao nga kinahanglan matud pa og direktang tulobagon ang mga gun owner sa hustong pag-amping niini.
Kalabot niini, nakigtimbayayong na ang DILG sa Department of Justice (DOJ) aron ipasaka ang petisyon sa Korte Suprema, samtang nanawagan usab sa mga magbabalaod nga amyendahan ang mga ming-igting nga balaod kalabot sa gun ownership ug liability.
Gawas sa hisgutanang pusil, gusto usab ni Remulla nga matubag ang impluwensya sa social media ug mga online community sama sa “true crime” groups sa mga kabataan nga posibleng nag-aghat og kapintasan.
Nakatakdang makigmeeting ang pamunuan sa DILG sa Department of Information and Communications Technology (DICT) ug posibleng mangayo og aksyon sa Kongreso alang sa mas hugot nga proteksyon sa mga bata online, lakip ang paglimita sa social media access sa mga menor de edad.
