BUTUAN CITY – Onsenta’y sais ka mga adlaw na lang, Pasko na. Karon pa lang, ukupad na ang ubang pamilyang Pilipino sa pagplano ug pagdaginot alang sa tradisyunal nga pagpangandam sa noche buena.
Apil niini ang subsob na usab nga pag-monitor sa mga duna’y katungdanan nga ahensya sa lihok sa presyo sa mga nag-unang palitonon ug mga rekado, aron masiguro nga makaya kini ug praktikal ang pagpamalit sa publiko para sa umalabot nga okasyon.
Dili mawala sa atong mga gipang-andam ang usa sa pinakasikat ug tradisyunal nga pagkaon sa mga Filipino nga kasagarang gi-andam kung naay okasyon ug giisip usab nga simbolo sa taas nga kinabuhi—ang bihon. Karon, ang usa ka putos sa bihon, anaa na sa P45, samtang ang pancit canton naa sa P30.
Apil usab sa kasagarang gi-andam ang spaghetti, nga sa pagkakaron anaa sa P55 ang tunga nga putos, samtang ang usa ka tibuok putos, anaa sa P90.
Ang mga nag-unang ingredients niini nga tomato sauce naa sa P35 hangtod P55, depende sa gidak-on ug brand. Samtang ang evaporada milk, anaa sa P25 hangtod P40, samtang ang kondensada anaa sa P40 hangtod P60.
