BUTUAN CITY – Gipanghimakak ni Vice President Sara Duterte nga ka-ila siya kang dismissed policeman ug kanhi security officer ni kanhi House Speaker Lord Allan Velasco nga si Rodulfo Gracioso Jr., dungan sa paglimod nga nakadawat siya og kwarta gikan niini.
Sa gipagawas niyang sulat-pamahayag ning adlawa, gibutyag ni Duterte nga gihulat pa sa iyang mga abogado ang opisyal nga kopya sa gipanumpaang pamahayag ni Gracioso gikan sa National Bureau of Investigation o NBI sa dili pa sila mag pasaka sa mga kaso batok kaniya.
Sigon ni Duterte, higayong ila nang mabungkag ang mga alegasyon nga anaa sa testimonya ni Gracioso, mahisama lamang kini sa gipanumpaang pamahayag usab ni Ramil Madriaga.
Una nang mipatim-aw si Gracioso, nga nagpakilalang kanhi head of security ni Velasco, ug miangkon nga nakahatod umano siya og mga maleta nga adunay sulod nga kwarta ngadto kang Vice President Duterte, kanhi Pangulong Rodrigo Duterte, ug Davao City First District Representative Paolo Duterte.
Sumala kang Gracioso, kapin ₱2 bilyon ang iyang nahatod ngadto kang Vice President Duterte sa kapin 20 ka higayon.
Apan alang kang Duterte, usa lamang ka “media stunt” ang maong mga alegasyon aron pagsulay nga buhion pag-usab ang impeachment case batok kaniya.
Gipadayag pa sa bise presidente nga mag-andam ang iyang kampo og mga kaso batok kang Gracioso human nila madawat ang opisyal nga kopya sa iyang affidavit gikan sa NBI.
