BUTUAN CITY – Nanawagan si Pangulong Ferdinand R. Marcos Jr. og mas lig-on nga aksyon gikan sa Association of Southeast Asian Nations kon ASEAN batok sa gender-based violence o kapintas nga gibase sa gender sa online spaces, samtang padayon nga nagkalapad ang digital economy ug connectivity sa rehiyon.
Sa iyang pagpamulong atol sa 4th ASEAN Women Leaders’ Summit sa Manila, gibutyag ni Pangulong Marcos nga adunay mga bag-ong hulga sa kababayen-an ug mga batang babaye tungod sa padayon nga digitalization, lakip na ang online harassment ug abuse.
Giklaro usab ni Pangulong Marcos nga gisuportahan sa Pilipinas ang paghimo og mga regional digital framework nga magpanalipod sa kababayen-an ug mga kabatan-onan, ug magsiguro nga magpabiling luwas ug mapuslanon nga lugar ang mga digital platform.
Nanawagan usab ang Pangulo og konkretong mga polisiya aron ma-adaptar ngadto sa aktuwal nga mga lakang ang mga commitment sa ASEAN alang sa women’s leadership, lakip ang pagpalig-on sa partisipasyon sa kababayen-an sa ekonomiya, peace and security, ug inclusive prosperity.
Sumala sa pangulo, ang Joint Ministerial Statement on Women’s Leadership for Inclusive Prosperity angay magsilbing roadmap sa mga member states sa ASEAN sa paghimo sa ilang mga polisiya ug programa padulong sa ASEAN Community Vision 2045.
