BUTUAN CITY – Gisorpresa ni Canadian singer Celine Dion ang mga nanan-aw atol sa pagbukas sa Paris Fashion Week human siya mipakita sa maong fashion event ug mihimo og espesyal nga performance ilawom sa sikat nga Eiffel Tower sa Paris, France.
Gikanta ni Dion ang iyang sikat nga kantang “I’m Alive,” nga unang misikat niadtong 2002. Nakapadani sa mga nanan-aw ang iyang performance, ilabina kay wala lamang siya mikanta, kundili misunod usab siya sa runway human sa iyang performance.
Ang pagpakita ni Dion nahimong usa sa mga highlights sa maong fashion event, diin gitapok ang mga prominenteng personalidad gikan sa kalibutan sa fashion ug entertainment.
Ang Paris Fashion Week usa sa mga gipaabot nga fashion events diin gipakita sa nagkalain-laing fashion houses ug designers ang ilang mga bag-ong koleksyon.
Sa pag-apil ni Dion, nakadugang kini og espesyal nga entertainment sa maong kalihukan, ilabina human niya gikanta ang usa sa iyang mga hit songs ug dayong rampa sa runway ubos sa Eiffel Tower.
