BUTUAN CITY – Misaka na sa 11,965 ang natalang kaso sa leptospirosis sa tibuok nasod gikan sa Enero karong tuiga hangtod niadtong September 23.
Sumala sa Department of Health kon DOH, mas taas kini og 46 porsyento kumpara sa 8,189 ka kaso nga natala sa samang panahon ning mi-aging tuig samtang mikunhod og 30-porsiento ang mga kaso sa dengue karong tuiga nga mi-abot sa 168,060 ka kaso kumpara sa samang panahon niaging tuig.
Apan, miabot sa 5.08 porsyento ang cumulative case fatality rate sa dengue karong tuiga kansa mas ubos kini kumpara sa 10.53 porsyento nga natala sa mi-aging tuig.
Sigon sa DOH, igo ang suplay sa mga tambal alang sa mga pasyenteng adunay leptospirosis nga gipang-apod-apod na sa nagkalain-laing bahin sa nasod sa wala pa magsugod ang ting-ulan.
Padayon usab nga gi-awhag sa DOH ang publiko nga magpakonsulta dayon sa doktor kung makasinati og mga sintomas sama sa taas nga hilanat ug grabeng kasakit sa lawas, ilabina kung nakalusong o naladlad sa baha.
Gipahinumdoman usab ang publiko nga magpadayon sa pagmintina sa kalimpyo aron makatabang sa paglikay sa pagkaylap sa mga sakit.
