BUTUAN CITY- Gitimbaya sa libaon ka mga tawo si Pope Leo XIV atol sa usa ka dakong open-air Mass sa sentro sa Paris, France, diin naghuot ang mga tawo sa Champs-Élysées Avenue samtang milabay ang Santo Papa sakay sa iyang popemobile ug nangumusta sa mga nanambong.
Gi-ampoan usab niini ang pipila ka mga masuso atol sa iyang pagbiyahe, samtang nag-kanta ug nagsinggit ang mga tawo og “Leo, Leo” isip pag-abiabi kaniya. Gilauman nga molapas sa tunga sa milyon ang mitambong sa maong seremonya sa Place de la Concorde, diin gitukod ang espesyal nga altar alang sa misa.
Gibisita usab ni Pope Leo ang Maison Bakhita, usa ka organisasyon nga nagsuporta sa mga refugee ug migrante, diin gipasiugda niini ang kamahinungdanon sa dignidad, kalinaw ug panag-uban sa komunidad, lakip ang dakong papel sa mga kababayen-an sa pagtukod sa usa ka mas maayong katilingban.
Gipahimangnoan usab sa Santo Papa ang publiko batok sa mga risgo sa artificial intelligence, ilabina sa posibilidad nga mawala ang pangkatawhanon taliwala sa paspas nga pag-uswag sa teknolohiya.
Gilauman nga magpadayon ang dagkong panon sa mga tawo sa iyang upat ka adlaw nga pagbisita sa France, lakip ang umalabot niini pag-bisita sa Lourdes ug Metz, diin pasidunggan niini si Robert Schuman, usa sa mga founding fathers sa European Union.
