BUTUAN CITY- Nag-andam ang Department of Health (DOH) og 48 ka higdaanan alang sa mga pasyenteng adunay leptospirosis sa mga pribadong ospital sa Metro Manila, lakip ang 11 ka dugang nga surge beds.
Duha pa lamang ka pasyente ang kasamtangang na-admit, busa 46 ka higdaanan ang bakante, diin pinakadaghan ang anaa sa Medical Center of Muntinlupa nga adunay 10, gisundan sa Olivarez General Hospital nga adunay walo ug F.Y. Manalo Medical Foundation Inc. nga adunay pito.
Samtang, lima ka higdaanan ang anaa sa Fatima University Medical Center ug lima usab sa Marikina St. Vincent General Hospital. Sa tibuok nasud, nakarekord na ang DOH og 8,317 ka kaso sa leptospirosis, 14 porsyentong mas taas kumpara sa 7,280 ka kaso niadtong miaging tuig.
Giawhag usab sa DOH ang publiko nga mokonsulta dayon sa pinakaduol nga health center kung makasinati og hilanat, pagsuka, kasukaon, kasakit sa kaunoran, sakit sa ulo ug pagpula sa mga mata.
