BUTUAN CITY- Naglisod na sa pagginhawa ang mga residente sa Borneo, Indonesia tungod sa baga ug peligroso nga haze nga resulta sa nagkagrabeng sunog sa kalasangan sa isla.
Nakasinati na ang mga katawhan og labad sa ulo, pagkalipong, ug kasakit sa mata, samtang nabalaka usab ang mga ginikanan sa kahimsog sa ilang mga anak.
Milapas na sa 1,100 ang Air Quality Index sa Pontianak, West Kalimantan, samtang kapin 113,000 ka kaso na sa respiratory infections ang natala sa pito ka probinsiya.
Nakaapekto usab ang baga nga aso sa operasyon sa airport, panginabuhi sa mga residente, ug pag-eskwela sa mga bata. Gipasanginlan usab sa mga eksperto ang El Niño, pagbag-o sa klima, pagkadaot sa kalasangan, ug slash-and-burn nga pamaagi sa paglimpyo sa yuta sa pagkagrabe sa mga sunog.
Nagpakusog ang mga awtoridad sa operasyon pinaagi sa water bombing ug cloud seeding aron makontrol ang sunog, samtang misaad si President Prabowo Subianto nga panubagon ang mga kompanyang mapamatud-ang responsable sa mga sunog.
