BUTUAN CITY – Gipa-ilalom na sa state of calamity ang probinsiya sa Agusan del Sur tungod sa epekto sa grabeng huwaw nga hatud sa nasinating El Niño phenomenon pinaagi sa gi-aprubahang Sangguniang Panlalawigan Resolution number 585-26 base sa rekomendasyon sa Provincial Disaster Risk Reduction and Management Council kon PDRRMC.
Base sa pinaka-ulahing taho, 36.4-porsiento sa kinatibuk-ang produkto sa agrikultura sa maong lalawigan ang na-apektuhan ug duna na usab kini epekto sa sypply sa kuryente ug tubig, apil na sa transportasyon ug communication systems.
Subay sa gihimong ebalwasyon, mikunhod na og 31.4% ang tubig sa mga watershed nga nakahatag og distroso sa panginabuhian sa mga mag-uuma, agrikultura, pamatigayon ug sektor sa industriya.
Sa update gikan sa Deparment of Agriculture- Caraga, gikumpirma ni Gerlie Antipaso, Disaster Risk Reduction and Management kon DRRM Operation Center Focal Person, nga humay ang aduna’y dakong damyos diin nanguna ang lalawigan sa Agusan del Sur, nga gisundan sa Butuan City, Agusan Del Norte, Surigao del Norte, Surigao Del Sur, ug Dinagat Islands.
