BUTUAN CITY – Duna’y nakitang systemic ug institutional failure sa opisyal nga imbestigasyon kabahin sa pagkasunog sa usa ka ospital sa Pakistan nga mikalas og 14 ka batang masuso ning mi-aging bulan.
Sumala sa report, ang neonatal unit sa Pakistan Institute of Medical Sciences o PIMS sa Islamabad walay fire alarms ug sprinklers nga makatabang unta sa pagpugong sa sunog.
Gi-report usab sa mga bombero nga ang mga agi-anan pagawas sa ospital nakakandado o nababagan, hinungdan nga lisod ang pagsulod ug pag-evacuate.
Usa ka bombero ang mihangyo nga dili nganlan, ang nagsulti nga sumala sa ubang rescue workers, hilabihan ka lisod ang pagsulod sa ospital tungod kay nakandado ang mga pultahan mao nga napugos ang mga rescuers pagguba sa mga bintana aron makasulod.
Bisan human makasulod, ang mga pultahan padulong sa ward nakandado gihapon. Sumala sa imbestigasyon, ang medical equipment nga gibutang ibabaw sa mga masuso natunaw ug nahugno ngadto kanila.
Ang investigative committee, nga gipangulohan sa usa ka retiradong senior civil servant, angbutyag nga ang insidente nagpakita og kapakyas sa sistema ug institusyon, diin ang usa ka yano nga electrical spark misamot ug nahimong dakong trahedya.
