BUTUAN CITY – Gibutyag ni PLtCol Emerson Alipit, Force Commander sa Agusan del Norte 1st Provincial Mobile Force Company, nga resulta sa maayong intelligence network sa kapulisan ang pagkasakmit sa mga smuggled cigarettes nga nagkantidad og ₱3.2 bilyon sa Barangay Talisay, lungsod sa Nasipit, Agusan del Norte.
Matod sa opisyal, tungod sa maayong relasyon sa mga pulis ug sa komunidad, nadawat nila ang impormasyon nga ila gilayong gi-verify ug gisundan sa pagpangayo og letter of authority ngadto kang Customs Commissioner Ariel Nepomuceno.
Dinhi na gihimo ang inspeksyon uban sa mga personnel sa Bureau of Customs o BOC niadtong Mayo 8 ning tuiga kondiin sa maong operasyon, nakita sa mga otoridad ang nagkalain-laing brand sa sigarilyo nga naghulat nalang og tukmang mando alang sa pagguba sa mga niini aron masiguro nga dili na mabaligya sa merkado.
Padayon usab ang imbestigasyon aron matino ug mapanubag ang mga responsable sa pagpalusot sa maong mga sigarilyo.
