BUTUAN CITY – Dili matungkad ang kalipay nga gibati ni Philippine Football Federation Board of Governors member ug Butuan City Vice Mayor Lawrence Lemuel Fortun dihang personal niyang nasaksihan ang pagkampyon sa Filipinas football team kagabii sa Asian Football Federation kon AFF Women’s Championship 2022 human giparot ang Thailand sa score nga 3-0.
Sa eksklusibong pakighinabi sa Bombo Radyo Butuan, gipadayag ni Vice Mayor Fortun nga makapanlimbawot sa balahibo ang convincing victory nga nakab-ot sa Filipinas ilabina nga nalipay na ganing daan ang mga Pinoy dihang nakasulod sila sa quarter finals samot na nga mitala na og kasaysayan sa prestihiyusong kompetisyon ang nasangpit nga koponan.
Dili matud pa basta-basta ang dakong improvement sa mga atleta ilabina nga wala pa sukad mapildi sa Team Filipinas ang defending champion Vietnam nga karong tuiga lang giparot sa Pilipinas ug dako usab matud pa og kontribusyon sa maong kada-ugan, ang coaching staff.
Ang kada-ugan matud pa sa Filipinas nahimong inspirasyon sa uban pang mga babayeng football players nga dili ihunong ang ilang pangandoy nga mu-excel sa maong natad ilabina nga kaniadto wala pa ma-ila ang nasangpit nga koponan tungod kay nakatutok lang ang atensyon sa tanan ngadto sa Philippine men football team nga Azkals.
Tungod niini, gidasig sa opisyal nga tutukan ang training sa mga female football players bisan diha una sa grassroots level hangtud nga maba-id na ang ilang abilidad sa maong dula.
