BUTUAN CITY – Gipasigarbo ni Department of the Interior and Local Government kon DILG Secretary Jonvic Remulla ang planong pagpalit nila og 1,500 ka mga bag-ong fire trucks alang sa Bureau of Fire Protection o BFP.
Paliton kini gikan sa South Korea pinaagi sa direktang Government-to-Government o G2G agreement tali sa duha ka nasud.
Gipahibalo ni Remulla nga mobiyahe siya ngadto sa South Korea sulod sa mosunod nga duha ka semana aron personal nga makigkita ug makigpulong sa gobyerno sa maong nasod alang sa pagpirma sa kasabutan ug pagsiguro nga hapsay ang mga detalye sa procurement.
Giklaro sa kalihim nga kini ang pinakadakong investment sa DILG alang sa mga kagamitan sa BFP dayong panghambog nga ang tibuok proseso gihimo nga wala matud pa’y bisan unsang bahid sa korapsyon.
Ubos sa kasabutan, ang matag-fire truck mapalit sa kantidad nga 10-milyones pisos, mas ubos og 6-milyon pesos kumpara sa mi-aging procurement sa BFP nga mikantidad og 16-milyones pisos ang matag-usa.
Tungod niini, gibanabana nga makadaginot ang gobyerno og hangtod 9-bilyones pisos sulod sa tulo ka tuig.
Tungod kay direkta ang kasabutan tali sa duha ka gobyerno, walay third-party middleman o supplier nga makasulod sa transaksyon. Siguruhon usab sa DILG nga ang mga fire truck nga paliton lig-on, de-kalidad ug angay sa panginahanglan sa nasod sa pag-atubang sa mga sunog.
