BUTUAN CITY – Giklaro ni ni House impeachment adviser ug prosecution spokesperson Robert Ace Barbers nga kinahanglang susihon og maayo ang mga impormasyon nga gibulgar ni kanhi Senador Antonio “Sonny” Trillanes IV kalabot sa gika-ingong mga financial transactions ni Vice President Sara Duterte ug sa iyang pamilya.
Sumala ni Barbers, dili lamang matud pa mga alegasyon ang gipadayag ni Trillanes tungod kay adunay pipila ka bahin sa financial trail nga natukma na sa mga rekord sa gobyerno.
Lakip niini ang 19 ka transaksyon nga random nga gisusi ug ang tanan niini adunay susamang entries sa mga rekord sa Anti-Money Laundering Council kon AMLC.
Sigon ni Barbers, ang impormasyon nga gihatag ni Trillanes usa sa mga hinungdan nga gilakip siya sa orihinal nga witness list sa prosecution alang sa Article II, nga naghisgot sa wealth, financial transactions, corporate interests ug posibleng mga discrepancy sa Statement of Assets, Liabilities and Networth kon SALN ni Vice President Sara Duterte.
Lakip sa mga isyung gihisgutan ni Trillanes ang financial dealings sa pipila ka miyembro sa Duterte family ug sa negosyanteng si Samuel “Sammy” Uy, ingon man ang corporate records sa Gencorp Industries, Metro City Chow Foods ug Cale88 Foods Corporation nga gilangkuban sa mga dokumentong gilambigit kang Atty. Manases “Mans” Carpio.
Pamugos ni Barbers, dili mawala ang mga documentary evidences bisan dili na makatestigo si Trillanes apan kinahanglan matud pang itandi ang mga impormasyong gipadayag ngadto sa mga rekord sa AMLC, mga bangko, Securities and Exchange Commission o SEC, ug SALN aron matino kung asa niini ang mahimong mapamatud-an pinaagi sa opisyal nga mga dokumento.
