BUTUAN CITY – Giklaro ni Department of Education kon DepEd-Caraga spokesperson Pedro Tecson nga dugay nang palisiya sa ahensya ang pagpagamit sa mga bata og transparent bag bisan niadtong wala pa gipagawas ang DepEd Order 006, alang sa maong katuyuan.
Tumong niini nga mapalig-on pa ang security measures alang sa pagprotekta sa mga estudyante sulod sa mga school campuses human ang sunod-sunod nga pagpamusil sa pipila na ka mga tunghaan sa tibuok nasud.
Pinaagi sa transparent bags, mas mapasayon angpagtumbok kung unsa ang dala sa mga estudyanteng musulod sa mga tunghaan.
Sa eksklusibong pakighinabi sa Bombo Radyo Butuan, gipadayag ni Tecson nga ilang gikalipay nga bisan ang mga magtutungha biluntaryong magpa-inspeksyon sa tanang manulod sa mga tunghaan.
Gi-obserba matud pa dinhi sa rehiyon ang no-contact policy kon dili paghikap sa mga manulod, gawas lang sa ocular inspection ug ang stop-and-freeze method.
Kung duna matud pa’y makitang gidili nga mga gamit, i-report gilayon kini sa principal ug mahimong ikostudiya ang tag-iya sa bag kung ang gidalang bawal nga gamit, maghatag og delikado apil na niini ang ginadiling druga.
Dugang pa ni Tecson, higayong masigpatan sulod sa transparent ang kadudahang butang, hangyuon na lang sa mag-inspeksyon ang tag-iya sa bag nga siya na ang maghabwa sa mga sulod niini tungod sa nagtunhay nga no-contact policy kon wala’y himuong pagkapkap.
Gipasabot usab niini nga duna’y mga ginikanan nga maglisod pagpalit niini tungod sa dugang gasto, apan nanghinaut na lang siya nga musunod niini ang tanan tungod kay bugtong tumong lang niini mao ang kaluwasan sa tanang anaa sa matag-tunghaan.
