BUTUAN CITY- Isip kabahin sa selebrasyon sa National Family Week, nagpahigayon ang Butuan City Police Office kon BCPO, pinaagi sa Women and Children Protection Desk kon WCPD ubos sa City Investigation and Detective Management Unit kon CIDMU, og seminar nga gitawag og “Responsible Parenting: Call for all Responsible Parents in Effective Child Nurturing” o Project C.A.R.E. kagahapong adlawa Septiyembre 28 sa SP Building Conference Room sa Barangay Doongan.
Gitumong sa kalihokan, nga gipangulohan ni PCOL Richie Yatar, City Director sa BCPO, ang pagpalig-on sa responsible parenting, ilabi na sa mga solo o single parents.
Gituki usab sa maong seminar ang positibo ug dili bayolenteng disiplina sa mga bata, mga katungod ug legal nga proteksyon sa mga menor de edad ubos sa mga may kalabutan nga balaod, ingon man ang mental ug emosyonal nga kaayohan sa mga ginikanan.
Gipasiugda sa BCPO, ang lig-on nga pamilya, usa ka importanteng pundasyon sa malinawon ug luwas nga komunidad, ug nagpamatuod usab kini sa padayon nga paningkamot sa pagpanalipod sa mga bata ug pagtabang sa mga pamilya.
