BUTUAN CITY – Wala’y nakuhang bisan usa ka armas o bala ang mga sakop sa National Bureau of Investigation-National Capital Region kon NBI-NCR human nila gi-raid ang balay ni Barobo, Surigao del Sur Mayor Ronnie Martizano kaganinang buntag sa Brgu Hubang.
Sigon sa mayor, ang gihimo sa mga sakop sa NBI, tubag matud pa sa reklamong ilang nadawat nga nagtiner siya og mga armas sama sa kalibre punto-45 nga pistola, KG ug duha rifle uban sa daghang mga bala.
Dugang pa ni Mayor Martizano, tumo-tumo lang ang maong reklamo ug siyento-porsiento siyang nagtuo nga kabahin sa matud pa ‘unfinished business’ batuk kaniya human nga wala siya mapatay sa ambush niadtong Pebrero ning tuiga.
Sigon pa sa mayor, ning mi-aging adlaw, nakasumbong na kaniya ang iyang mga silingan nga duna’y mga lalaking nakamotorsiklo nga naglabay-labay sa iyang balay, lain pa sa usa ka tawong nagdala-dala og manok nga sakay sa usa ka kolor itom nga sakyanan ug duna usa’y nagpalupad og drones sa ilang dapit.
Usa gihapon matud pa ka pinili nga opisyal sa ilang lungsod ang mireklamo kinsa wala matud pa maka-move on sa iyang pagdaug taliwa nga wala siya’y gigamit nga kwarta rason iya na lang kining gitambagan nga hulaton ang eleksyon.
