BUTUAN CITY – Gi-anunsiyo sa mga opisyal sa panglawas nga ang outbreak sa measles sa South Carolina, ang pinakadako nga nasinati sa United States sulod sa pipila ka dekada, opisyal nang natapos.
Gikan sa hapit 1,000 ka kumpirmadong kaso sulod sa mga unom ka bulan, lakip na ang labing menos 21 ka na-admit sa ospital, wala nay bag-ong kaso nga nalambigit sa outbreak sulod sa kapin 42 ka adlaw, nga nagpasabot og duha ka incubation period, ang panahon nga gikinahanglan aron magpakita ang sakit human ma-expose sa virus — nga walay transmission.
Nagsugod ang outbreak sa South Carolina niadtong Oktubre, ug nakatampo kini sa rekord nga gidaghanon sa kaso sa measles sa United States, uban sa dako ug makamatay nga outbreak sa West Texas.
Posible nga mas mosaka pa ang mga kaso karong tuiga, nga mahimong pinakagrabe sukad gideklarar nga na-eliminate ang measles sa US niadtong 2000.
Sumala sa mga eksperto sa public health, ang pagtaas sa kaso sa measles sa US kasagaran gipasangil sa pagkunhod sa vaccination rates; kapin sa 90% sa mga kaso sa South Carolina — ug sa tibuok nasod — nahitabo sa mga tawo nga wala makadawat sa MMR vaccine. Ang kadaghanan niini mga bata.
Apan, adunay sayo nga timailhan nga posibleng misaka gamay ang vaccination rates sa MMR vaccine alang sa mga gagmay nga bata sa US.
Sumala ni Dr. Brannon Traxler, deputy director and chief medical officer sa South Carolina Department of Public Health nga ang pagtaas sa vaccination coverage adunay dako nga papel sa pagpugong ug pag-control sa outbreak.
