BUTUAN CITY – Giklaro ni forester Nelson Caranzo sa Department of Environment and Natural Resources-Community Environment and Natural Resources Office kon DENR-CENRO Nasipit, nga wala gideklarang protected area ang Mt Mayapay ning siyudad sa Butuan.
Sa eksklusibong pakighinabi sa Bombo Radyo Butuan, gipadayag sa opisyal nga base sa Comprehensive Land Use Plan kon LUP sa Butuan City government, usa kini ka timberland nga gi-classify isip strictly protected forest sa lokal nga kagamhanan. Base usab sa report sa Mines and Geosciences Bureau kon MGB, gikonsidera kining hazard-prone area.
Iyang gipasabot nga tungod kay timberland, cover kini sa balaud sa nasud apil na niini ang pagdili sa mga tawo sa pag-ukupa, pag-angkon, paggamit ug paglusad og bisan unsa mang kalihukan sa forest land.
Kini ang rason nga foul gayod ang mga paglapas niini bisan pa man og kini alang lang sa panginabuhian sa mga nagpuyo sa maong lugar.
Giklaro usab ni CENRO Caranzo nga ang gihimong aksyon sa Butuan City government sa maong bukid, mao ang pagbaraw sa gipangtukod nga mga istraktura nga wala’y building permit gikan sa Office of the Building Official kon OBO rason nga gimanduan silang muhimo og self-demolition sa ilang mga istraktura.
