BUTUAN CITY – Gipakusgan sa Local Price Coordinating Council ang pag-monitor sa presyo ug supply sa mga nag-unang palaliton og serbisyo sa Butuan City.
Atol sa third quarter Local Price Coordinating Council meeting, gipresentar ang local price and supply monitoring report ug ang resulta sa Oplan Bantay Presyo monitoring kondiin gitutukan niini ang presyo ug supply sa mga nag-unang palaliton lakip ang pagsiguro nga nasunod ang saktong presyo, og malikayan ang dili makatarunganong pagpataas sa singil.
Gihatagan usab og update ang estado sa supply sa kuryente, ug ang electricity rates ning siyudad kumpara sa ubang lugar.
Gipakita sa report ang kalainan sa mga singil ug mga hinungdan nga nakaapekto niini, apil usab ang water supply situation sa siyudad lakip ang mga lakang aron matubag ang mga problema sa supply ug mapadayon ang serbisyo sa mga apektadong lugar.
Nahisgutan usab ang El Niño preparatory and contingency plan, isip pagpangandam sa posibleng epekto niini ingon man ang mga lakang aron mapadayon ang supply sa tubig, kuryente, pagkaon uban pang importanteng serbisyo kung musamot pa kini.
