BUTUAN CITY – Gipa-ambit sa Butuan City Government ang kasinatian niini sa pagpatuman sa mga reporma ug pagpa-uswag sa lokal nga pagdumala atol sa unang BANYUHAY National Public Service Summit nga gipahigayon sa The Manila Hotel.
Ang Butuan City maoy gipili sa Civil Service Commission Central Office aron mupresentar sa transformation journey niini ngadto sa mga lider sa gobyerno, policymakers ug human resource experts.
Mitambong sa kalihokan si Mayor Law Fortun, kauban si kanhi Mayor Engr. Ronnie Vicente Lagnada ug mga department heads sa siyudad.
Gihisgotan ni Lagnada ang mga reporma nga nagtumong sa pagpalig-on sa mga sistema sa lokal nga pagdumala ug paghatag og mas episyente, transparent ug responsive nga serbisyo publiko.
Giklaro usab sa summit ang kamahinungdanon sa maayong pagpangulo, pagpili sa mga kawani base sa ilang kwalipikasyon, pagpa-uswag sa mga polisiya ug paggamit sa teknolohiya aron mapadali ang serbisyo sa katawhan.
Ang BANYUHAY nagtinguha nga mapalig-on ang kalidad sa serbisyo sibil sa Pilipinas gikan ning tuiga 2026 hangtod 2030.
