BUTUAN CITY – Nadakpan na sa mga sakop sa Intelligence Unit sa National Capital Region Police Office (NCRPO) si kanhi Dinagat Islands Congressman Ruben Ecleo Jr., sa gipahigayong operasyon sa Diamond Subd., Balibago, Angeles, Pampanga kaganinang alas-4:30 sa kaadlawon.
Sa taho nga gisubmitar ni NCRPO director M/Gen. Debold Sinas ngadto kang PNP Chief P/Gen. Archie Francisco Gamboa, nasayrang ang pagdakop kang Ecleo base na sa warrant of arrest tungod sa paglapas sa Sec 3 (e) sa RA 3019 kon “Anti-Graft and Corrupt Practices Act” nga gi-isyu sa 1st Division Sandiganbayan.
Nadakpan na usab ang driver niini nga nailang si Benjie Relacion Fernan alyas “Smile” nga maoy nagtago ilawom sa kanhi representante sa Dinagat Islands.
Ang duha ka suspek gidala sa NCRPO, Camp Bagong Diwa sa Bicutan sa Taguig City alang sa interogasyon kinsa nakuhaan usab og ubay-ubay nga kwarta.
Ang 63 anyos nga si Ecleo mao ang No. 1 sa most wanted sa reward list sa Department of the Interior and Local Government nga dunay reward nga 2-milyones para sa iyang pagkadakop.
Tuig 2011 pa nagtago sa balaod ang kanhi kongresista apan tuig 2006 pa gihukman sa kasong graft si Ecleo tungod sa construction sa public market ug townhall ug pagplastar sa iyang cult building sa San Jose, Dinagat Islands, niadtong mayor pa kini sa maong lugar niadtong tuig 1990s.
