BUTUAN CITY – Mukabat sa 7.786-gramos sa suspected shabu ang nakumpiska sa gilusad nga drug-buy bust operation pasado alas-3:01 kaganinang kaadlawon sa Purok 2, Barangay San Ignacio ning siyudad sa Butuan.
Gilusad kini sa mga sakop sa Station Drug Enforcement Unit sa Butuan City Police Station-1 pagpanguna ni assistant station commander PLt Bonifacio Castro Jr.
Nakuha gikan sa 50-anyos nga suspetsadong si alyas Julie, lalaki ug residente sa Purok 3 sa maong barangay ang maong epektos nga gibana-banang mukantidad og ₱52,944.
Gilusad ang operasyon human malampusong nakapalit og usa ka poseur-buyer og usa ka selyadong transparent plastic sachet nga dunay sulod nga suspected shabu nga maoy gihimong buy-bust item.
Dihang girekisa ang iyang lawas, nakuha gikan kaniya ang usa ka pitaka nga duna’y sulod nga 500-pisos nga salaping cash nga maoy gigamit nga buy-bust money ug laing duha ka sachets sa suspected shabu.
Gikostudiya na ang suspetsado ug ang nakumpiskang mga butang sa BCPS1 alang sa tukmang disposasyon.
