BUTUAN CITY – Padayon ang pag- intercept sa Israel sa pagpalupad og mga rockets gikan sa mga Hamas militants sa Gaza Strip.
Sumala ni Ron Kimwell Morales, usa ka Caregiver sa Israel ug lumad nga taga-Brgy. Pindasan, Mabini, Davao De Oro sa pakighinabi sa Bombo Radyo Butuan, na-stress na ang mga tawo sa ilang nasud tungod sa padayong pagbuhi og mga rockets sa mga militanteng grupo nga nakamugna og kalisang sa mga tawo labi na kung adunay makalusot nga rocket nga dili ma-intercept sa Iron Dome System.
Ang Iron Dome mao ang mobile all-weather air defense system nga gidesenyo aron mo-intercept ug muguba sa mga short-range rockets ug artillery shells nga ginapalupad sa kawanangan sama sa gihimo sa Hamas militants.
Sumala ni Morales, anaa na lamang nagpundo sulod sa panimalay nga adunay proteksyon o shelter ilabina kadtong anaa duol sa lugar sa kagubot tungod kay adlaw ug gabie adunay manglupad nga mga rockets.
Hinuon gipadayag niini nga wala nagkulang og pahimangno ang gobyerno sa Israel alang sa mga residente ug wala na usab matod pay laing pag-ampo ang mga tawo karon sa Israel kundi mahuman na ang kasamtangang kagubot.
Madumdumang muabot na sa kapin 70 katao na ang namatay sa Gaza samtang pito usab sa Israel sukad miulbo ang kagubot tali sa Hamas militants.
