BUTUAN CITY – Nisaad ang Thailand ug Cambodia nga ipadayon ang abli nga komunikasyon og molikay sa mga lakang nga mamahimong magpasamot pa sa tensyon human ang trilateral meeting nga gipangunahan sa Pilipinas sa sidelines sa 48th ASEAN Summit.
Gipangunahan ni Pangulong Ferdinand Marcos Jr. ang nasangpit nga meeting kauban sila Cambodian Prime Minister Hun Manet ug Thai Prime Minister Anutin Charnvirakul, isip kabahin sa papel sa Pilipinas isip ASEAN chair.
Sigon ni PBBM, tumong sa pagpulong nga maghatag og “meaningful space for constructive dialogue” mahitungod sa padayon nga away sa utlanan sa duha ka nasud.
Sa joint press conference, gibutyag sa Pangulo nga parehong giila sa duha ka lider ang kamahinungdanon sa restraint, padayon nga komunikasyon ug malinawong pagresolba sa isyu.
Gihimo ang pulong taliwa sa midakong tensyon tali sa Thailand ug Cambodia tungod sa mga giilogang teritoryo dool sa Preah Vihear temple ug pipila ka parte sa Gulf of Thailand.
Nagpasalamat sila Hun Manet ug Anutin sa Pilipinas sa pag-facilitate sa dayalogo.
Samtang gipamugos ni Anutin nga mahinungdanong malikayan ang kagubot sa duha ka managlahing nasud.
Dungan niini, gipahayag usab ni PBBM ang pag-extend sa mandato sa ASEAN Observer Team (AOT) hangtud sa Hulyo aron ipadayon ang pagbantay sa pagpatuman sa mga kasabutan tali sa Thailand ug Cambodia.
