BUTUAN CITY- Gipakita na sa Bureau of Customs kon BOC kagahapong adlawa Septiyembre 24 ang 54 ka container van nga nasakmit sa gipahigayong operasyon sa mga otoridad tungod sa gidudahang pagpasulod og smuggled cigarettes sa Gothong Private Wharf sa Barangay Talisay, Nasipit, Agusan del Norte, kansa adunay gibanabang kantidad sa market price nga mokabat og 3.2 bilyones pesos.
Ang maong shipment nasakmit niadtong Mayo 8, 2026, alas-9 sa buntag, ug pormal nga gipakita kagahpon sa buntaga sa mga personahe sa BOC nga gipangulohan ni Redford Surposa, Chief sa Customs Intelligence and Investigation Services Field Station sa Cagayan de Oro ug Surigao, uban sa mga representante sa Philippine National Police o PNP.
Sumala ni Surposa, usa kini sa pinakadakong accomplishment sa ahensya batok sa smuggling sa tibuok nasud, samtang iyang gipasalamatan ang mga ahensya sa gobyerno nga mitabang sa operasyon tungod dako usab kini nga pagkawala sa kita sa gobyerno, ilabina sa hustong pagbayad sa buhis.
Gibutyag usab ni PLtCol Emerson Alipit Force Commander sa 1st Provincial Mobile Force Company, nga ang pag-aksiyon gihimo human makadawat gikan sa kasaligang impormasyon ug pinaagi sa dakong koordinasyon sa Bureau of Customs, malampusong nakumpiska ang mga smuggled cigarettes nga gikarga sa 54 ka container vans.
Pagklaro pa niini, klase-klaseng brand sa sigarilyo ang nakita ug nakakostodiya sa awtoridad samtang gipaabot ang mando aron kini pang gub-on ug masigurong di mabaligya sa merkado. Mapasalamaton usab si Alipit sa komunidad sa pagsalig ug pag report.
Sa kasamtangan, padayun pa kining gi-imbestigahan aron pormal nga mapasakahan og tukmang kaso ang responsable sa pagpalusot sa pekeng sigarilyo.
