BUTUAN CITY- Nagpatungha pag-usab og kabalaka bahin sa seguridad sa mga estudyante ug sa pag-access sa mga menor de edad sa armas ang sunod-sunod nga insidente sa pagpamusil sulod sa mga eskwelahan, lakip ang makamatay nga shooting sa Banga National High School sa South Cotabato niadtong Septiyembre 18, kung asa base sa taho, tulo ang namatay, lakip ang giingong gunman, ug walo ang nasamdan, samtang ang armas nga gigamit giingong iya sa amahan sa estudyante ug nakuha gikan sa gitipigan nga pusil sa panimalay.
Sa exklusibong pakighinabi sa Bombo Radyo Butuan kang Joaquin Buenaflor, National Convenor sa Youth Rage Against Corruption, gikasubo niini ang maong insidente.
Sumala ni Buenaflor, dili matud pa angay tan-awon ang mga kabatan-onan isip suspek kondili biktima usab sa nagkadaghang kapintasan sa katilingban.
Gipunting usab niini ang duha ka isyu, ang pag-normalize sa kultura sa kapintasan ug ang kakulang sa igo nga proteksiyon aron mapugngan ang mga bata sa pag-access sa armas.
Gikutlo usab sa National Convenor, ang mga pahayag kani-adto ni Kanhi President Rodrigo Duterte bahin sa pagpatay sa mga giakusahan nga nalambigit sa droga isip pananglitan sa retorika nga sumala sa iyang panan-aw, mahimong makatampo sa pag-normalize sa kapintasan.
Ang maong mga pahayag ni Duterte kaniadto dokumentado usab sa opisyal nga mga rekord ug mga taho sa media. Bisan pa niini, padayon pa ang imbestigasyon sa Banga shooting, lakip ang mga posibleng hinungdan ug pamaagi kung giunsa pagkuha sa menor de edad ang armas.
