BUTUAN CITY- Gikuha na sa Bureau of Internal Revenue (BIR) ang Value-Added Tax o VAT sa allowable system loss charge sa kuryente, subay sa Revenue Memorandum Circular No. 97-2026 nga gipagawas kagahapong adlawa Lunes, Setyembre 14, 2026 ubos sa pagpangulo ni Commissioner Charlito Martin Mendoza.
Pinaagi sa maong circular, giila ang allowable system loss charge isip government-mandated pass-through cost nga dili na iapil sa gross sales alang sa pagkalkula sa VAT, busa dili na kini pahamtangan og output VAT ug creditable withholding tax sa VAT.
Sigon ni Mendoza, ang maong lakang subay sa direktiba ni President Ferdinand Marcos Jr. ug Finance Secretary Frederick Go aron makahatag og praktikal nga mga solusyon sa pagpagaan sa kabug-at sa mga konsumidor tungod sa taas nga presyo sa mga palaliton ug bayranan sa kuryente.
Gimando usab sa BIR nga klaro ug bulag nga ipakita ang allowable system loss charge sa billing statements ug invoices sa mga generation company, National Grid Corporation of the Philippines, distribution utilities, ug electric cooperatives alang sa transparency.
Bisan dili niini hingpit nga masulbad ang problema sa taas nga singil sa kuryente, gilauman sa BIR nga ang matag pisong maminusan sa bayranan ug mahimong dugang nga tabang sa adlaw-adlaw nga panginahanglan sa mga pamilyang Pilipino.
