BUTUAN CITY – Nagpabiling dili pa “medically fit to travel” si kanhi House Speaker Martin Romualdez subay sa gitakdang hearing karong adlawa sa Sandiganbayan.
Base kini sa pinakabag-ong medical certification nga gipagawas sa iyang mga doktor sa Cardinal Santos Medical Center.
Sumala ni Philippine National Police kon PNP Public Information Office Chief Col. Allen Rae Co, ang mga doktor lamang sa kanhi opisyal ang adunay katungod sa paghatag sa kompletong detalye bahin sa iyang kahimtang sa panglawas kondiin ilang opisyal nga gikumpirma nga dili pa siya mahimong mobiyahe sa pagkakaron.
Gikatakda untang muhimo og hearing karong adlawa, Septembre 10, ang Sandiganbayan Third Division aron desisyunan kung padayon ba nga tugotan si Romualdez nga magpabilin ubos sa hospital arrest human siya gisilbihan og warrant of arrest may kalabotan sa kasong plunder.
Gimanduan usab sa korte ang iyang mga attending physicians nga mutambong sa hearing aron maghatag og katin-awan ug opisyal nga report bahin sa iyang kahimtang.
Madumdumang gidakop ug gipa-ilalom sa police custody si Romualdez sulod mismo sa iyang kwarto sa ospital niadtong Lunes samtang nagpa-ayo gikan sa gika-ingong cardiovascular event, taas nga presyon sa dugo, ug panic attack.
Padayon usab nga nakig-coordinate ang Criminal Investigation and Detection Group (CIDG) sa ospital, ilabina kung mausab ang kahimtang sa panglawas sa kanhi Speaker ug tugotan na siya nga dad-on mismo ngadto sa korte.
