BUTUAN CITY- Angol ang usa ka police personnel sa Caraga human maigo sa bala atol sa usa ka police operation duol sa Central Pilot Elementary School sa Sinsuat Avenue, Poblacion, Cotabato City kagahapon sa buntag Septiyembre 14, atol sa gipahigayong 2026 Bangsamoro Autonomous Region in Muslim Mindanao kon BARMM Parliamentary Elections.
Sumala ni PLt.Col. Jennifer Ometer, chief sa Regional Public Information Office-13 kon RPIO-13, ang nasamdan giila nga si Patrolman Justeen Reo Ga, kinsa nakatalaga sa Dinagat Islands Police Provincial Office ug usa sa 887 ka Caraga police personnel nga nadestino sa BARMM alang sa eleksyon.
Gibutyag usab sa tigpamabag, nga maayo na ang kahimtang sa nasamdan nga personnel human kini nakadawat og medical assistance. Nahitabo ang insidente sa Central Pilot Elementary School sa Sinsuat Avenue, Poblacion 6, Cotabato City, diin adunay indibidwal nga mikuha og armas ug mipusil, hinungdan nga naigo ang maong police personnel ug laeng tulo usab ka sibilyan nga anaa sa maong lugar.
Sigon pa ni Ometer, nga base sa inisyal nga report nga ilang nadawat, naigo ang police sa iyang tuo nga bitiis, apan maayo na ang kahimtang sa iyang samad ug nakapadayon gihapon sa iyang security duties. Ang mga PNP personnel nga nadestino sa BARMM adunay 10 ka adlaw nga deployment ug gilauman nga makabalik uban sa ilang mga kauban human sa ilang misyon.
