BUTUAN CITY- Pormal nga gitugyan sa Provincial Government of Agusan del Norte, pinaagi sa Provincial Disaster Risk Reduction and Management Office kon PDRRMO nga gipangulohan ni Head Erma Suyo, ang mga rescue vehicle ngadto sa unom ka barangay sa lungsod sa Nasipit atol sa pagpirma sa Memorandum of Agreement (MOA) uban sa mga opisyal sa barangay kaganiha Septiyembre 17, 2026, sa Capitol Lobby sa Butuan City.
Ang nakadawat nga mga barangay mao ang Ata-atahon, Punta, Jaguimitan, Camagong, Talisay, ug Poblacion 5. Sa iyang mensahe, gipasiugda ni Governor Ma. Angelica Rosedell Amante ang responsibilidad sa mga opisyal sa gobyerno nga magpabiling matinud-anon ug siguruhon nga ang pondo ug mga kagamitan sa publiko magamit lamang alang sa ilang gitakdang katuyoan, ilabina sa pagdala sa mga pasyente ngadto sa mga ospital ug pagtubag sa mga emerhensiya.
Gihangyo usab sa gobernadora ang mga opisyal sa barangay nga husto nga gamiton ug atimanon ang mga rescue vehicle aron mapuslan sa ilang mga lumulupyo.
Nagpasalamat usab si Nasipit Municipal Mayor Roscoe Democrito Plaza sa padayong suporta ni Governor Amante, nga matud niini makatabang sa pagpalig-on sa emergency response capability sa lungsod ug pagpagaan sa responsibilidad sa lokal nga kagamhanan.
Ang mga barangay captain nga nakadawat sa mga sakyanan misaad usab nga ilang panalipdan ug husto nga ampingan ang mga kagamitan, samtang nagpahayag ang municipal government sa plano nga hinay-hinay nga makahatag og dugang nga mga sakyanan ngadto sa ubang barangay. Mitambong usab sa turnover ceremony si Vice Governor Enrico Corvera, ang mga barangay captain nga hingtungdan, ug mga empleyado sa provincial government
