BUTUAN CITY – Nagpadayon ang mga kalihukan sa tulo ka adlaw nga 28th Caraga Business Conference sa Surigao City nga matapos ugmang adlawa ubos sa temang “One Caraga, One Vision: Advancing Regional Prosperity Together.”
Gitambongan kini sa mga lider sa gobyerno, business sector, chambers of commerce, industry partners ug stakeholders gikan sa nagkalain-laing bahin sa Caraga Region.
Opisyal kini nga gi-ablihan ni Philippine Chamber of Commerce and Industry kon PCCI Eastern Mindanao Regional Governor ug Conference Chairperson Francis Marc Ty lakip na ni Surigao Chamber of Commerce and Industry, Inc. kon SCCI President Melva Garcia.
Nakatutok ang unang adlaw sa mga isyu ug oportunidad sa infrastructure, strategic industries, essential utilities, energy, water solutions, micro small and medium enterprises kon MSMEs, digital connectivity ug sustainable development sa rehiyon.
Si kanhi Sarangani Province Governor Miguel Rene Dominguez kansa– Presidente sa General Santos City Chamber of Commerce and Industry, mipa-ambit sa mga kalambuan nga na-angkon sa General Santos City isip Guest Speaker dihang gisaysay niini nga ang GenSan nagkakusog karon sa pag-export sa tuna.
Lakip sa masaksihan ang trade fair and exhibit, networking activities, keynote presentations ug plenary discussions nga nagtinguha sa pagpalig-on sa koordinasyon tali sa gobyerno ug private business sector alang sa padayong paglambo sa Caraga.
Samtang gipadayag ni Surigao City Mayor Pablo Yves Dumlao II, ang kamahinungdanon sa pagtimbayayong tali sa lokal nga panggamhanan, mga negosyante, MSMEs ug nagkalain-laing sektor aron mapalig-on ang ekonomiya ug mapadayon ang kalamboan sa rehiyon sa Caraga.
