BUTUAN CITY – Himuon sa Boracay Newcoast sa Malay, Aklan karong Agosto 21 hangtod 23 ang 4th Southeast Asian Open Water Championships nga gi-andam sa Philippine Sports Commission (PSC).
Sigon ni Eric Buhain, secretary general sa Philippine Aquatics Inc., sama sa Indonesia nga adunay Bali ug Thailand nga adunay Pattaya, karon ang Pilipinas adunay Boracay nga ikapanghambog, ug gilauman nga daghang swimmers ug turista ang motan-aw sa open water swimming meet.
Sumala ni Anthony Reyes, executive director sa PAI, walo sa 11 ka mga miyembro sa Southeast Asian Swimming Federation ang moapil sa kompetisyon nga langkuban sa Indonesia, Laos, Malaysia, Singapore, Thailand, Timor Leste, Vietnam ug ang host nga Pilipinas.
Gilauman nga kapin sa 200 ka mga swimmers ang mu-apil sa regular medal distances nga 5 ug 10 kilometros sa men’s ug women’s division alang sa usa ka 1.66-kilometer square course.
Dugang pa ni Buhain, mas daghan pa ang moapil sa open water festival nga adunay 3 ug 5-kilometer distances nga dungan sa regular meet, nga makapadako sa ihap sa mga partisipante ug makasuporta sa adbokasiya sa PSC Chairman Patrick Gregorio alang sa sports tourism.
