BUTUAN CITY – Posibleng ipatawag ni Pangulong Ferdinand Marcos Jr. ang Chinese Ambassador sa Pilipinas nga si Jing Quan human sa kontrobersiyal niyang pamahayag nga dali rang mapildi sa China ang Pilipinas kung mogamit sila og pwersa.
Gipadayag ni Jing ang maong komento atol sa iyang pag-apil sa Second Diliman Dialogue sa Quezon City, diin iyang gibutyag nga kung gusto sa China nga mogamit og pwersa, dali nilang mapildi ang Pilipinas, apan wala sila magtinguha niini tungod kay gusto nilang mapadayon ang kalinaw sa rehiyon.
Kung sama matud pa sila sa laing mga dagkong nasud sa ubang rehiyon, hayan dugay na usab nga duna’y giyera sa Asya apan mas gipili matud pa nila ang kalinaw taliwa nga sila matud pa ang kanunay birahan sa Pilipinas pinaagi sa smear campaign ug sa pagpanakop sa ilang mga kababayan.
Tungod niini, gikondena sa Department of Foreign Affairs o DFA ang pamahayag ug gihulagway kini nga dili direktang hulga sa paggamit og pwersa, dayong pahinumdoman sa mga diplomats sa pag-amping sa ilang mga pulong ilabina sa sensitibong relasyon tali sa Manila ug Beijing.
Samtang mibatikos usab si Philippine Coast Guard spokesperson Rear Admiral Jay Tarriela sa maong pamahayag, ilabina sa pag-ingon ni Jing nga swerte ang Pilipinas nga nakasilingan sa China.
Samtang alang sa pangulo, dili matud pa diplomatiko ang maong pamahayag nga iya karong gitun-an ang pagpatawag kang Ambassador Quan aron maklaruhan sa iyang gipamulong nga iyang gibungat samtang nagpadayon ang tensyon sa West Philippine Sea.
