BUTUAN CITY -Dako ang pasalamat sa Philippine Red Cross–Butuan City/Agusan del Norte Chapter sa Bombo Radyo Philippines tungod sa pagpahigayon pag-usab sa nationwide bloodletting activity karong Nobyembre 14 nga himuon sa nagkada-iyang siyudad sa nasod nga adunay mga istasyon sa Bombo Radyo ug Star FM.
Matud ni Alger Boter, administrador sa Philippine Red Cross–Butuan City/Agusan del Norte Chapter, taas karon ang panginahanglan sa dugo tungod sa kadaghan sa mga pasyenteng na-admit sa mga ospital.
Matud pa niya, usa sa ilang dakong hagit ang kakulang sa mga boluntaryong blood donors nga gisaligan sa mga pasyenteng anaa sa emergency situation ug nanginahanglan og daling pagbalhin sa dugo.
Base sa ilang rekord, anaa lamang sa lima hangtod napulo ka indibidwal kada adlaw ang boluntaryong nagdonar og dugo sa ilang opisina, samtang moabot sa 35 hangtod 40 ka blood bags kada adlaw ang ilang gipagawas gikan sa blood bank.
Tungod niini, giila ni Boter nga usa ka halangdon nga kalihukan ang nationwide bloodletting activity nga gipasiugdahan sa Bombo Radyo Philippines network uban sa Bombo Radyo Philippines Foundation Incorporated ug angay lamang nga suportahan sa publiko.
Matud pa niya, kada tuig gihulat sa publiko ang maong blood donation activity nga gitawag nga “largest one-day bloodletting activity” sa nasod tungod sa kadaghan sa mga kinabuhi nga mahimong matabangan niini, ilabina nga ang dugo dili mahimong himoon o maprodyus sa laboratoryo.
