BUTUAN CITY – Miabot sa 39 katawo ang napatay sa lain na usab nga adlaw sa dakong pagpamomba sa Israel sa Lebanon sigon sa health ministry sa Lebanon.
Ang usa sa mga Israeli strikes sa habagatang lungsod sa Saksakiyeh nakapatay og labing menos pito ka tawo, lakip ang usa ka bata.
Sigon sa Israel Defense Forces nga ilang target ang Lebanese armed group nga Hezbollah ug “nakahibalo sila sa mga taho mahitungod sa kadaot sa mga sibilyan nga wala’y labot.”
Nagpadayon ang pagbinayloay og pag-atake tali sa Israeli forces ug Hezbollah sukad gipahibalo ni US President Donald Trump ang ceasefire agreement tali sa gobyerno sa Israel ug Lebanon niadtong Abril 16.
Kadaghanan sa air strikes sa Israel nakaigo sa habagatang Lebanon, diin sumala sa militar nga ilang gi-target ang infrastructure ug mga tawo nga konektado sa Hezbollah, ang militia ug political party nga gisuportahan sa Iran.
Niadtong Sabado, ang state-run nga National News Agency nagtaho og Israeli strikes sa tibuok habagatang bahin, lakip na sa Saksakiyeh.
Sumala sa health ministry, ang maong pag-atake “misangpot sa inisyal nga ihap nga pito ka patay, lakip ang usa ka batang babaye, ug 15 ka samaran, lakip ang tulo ka bata.”
Giangkon sa IDF nga ilang giatake ang “mga Hezbollah terrorists nga naglihok sulod sa usa ka estruktura nga gigamit alang sa military purposes” sa maong lugar.
