BUTUAN CITY – Ubay-ubay nga mga isyu kalabot sa water supply ang naklaro sa panig sa grupong Water Watchdog Butuan kon WWB human ang ilang pakigtabo kang Butuan City Water District kon BCWD General Manager Engr. John Michael Benito.
Sa eksklusibong pakighinabi sa Bombo Radyo Butuan, gibutyag ni WWB founder Oliver Terante nga gipasabot ni Engr. Benito kanila nga wala’y monopoly ang TASC kon Taguibo Aqua-Tech Solutions Corporation tali sa BCWD kung mangita sila og laing tuburan sa tubig.
Nasayran nga ang TASC mao ang water bulk supplier sa BCWD rason nga makapangita sila og laing water supplier, kung ilang gustuhon.
Gawas niini, nasuta usab nga ang Butuan City Water District, duna’y 17 ka mga pumping stations kondiin sa maong ihap, 4 lang ang functional ug sa upat, usa lang ang operational kon gigamit.
Gipaspasan matud pa karon sa BCWD ang paghimo sa laing tulo ka pumping stations aron kini mahimong operational.
Kung hi-usahon ang kapasidad sa upat ka mga pumping stations, mu-abot sa 10-million liters per day ang ma-produce nga tubig.
Kung mahimo pang operational ang tanang 17 ka mga pumping stations, mu-abot unya sa 72.5-million liters per day ang ma-produce kansa dako na kaayo nga volume sa tubig.
