BUTUAN CITY – Abli na ang panghuna-huna ug kasing-kasing sa mga draybers ug operators lakip na mga commuters ang gihingusgang Tricycle Modernization Program sa siyudad sa Butuan.
Sigon ni Ma. Kristina Cassion, City Government Department Head II sa Butuan City Trade, Industry and Investment Promotion Officer, base kini sa ilang gihimong assessment human ang katapusang focused Group Discussion kagahapon.
Aminado si Cassion nga sa pagsugod pa lang, daghan ang kalibog kalabot sa programa apan human sa ilang pakig-estorya sa mga drivers, operators og commuters og pag-imbitar sa mga lideres, nadawat na nila ang programa.
Kamatooran niini, uyon na ang grupo sa mga drivers/operators nga magmugna og kooperatiba samtang gi-awhag ang mga commuters nga magmugna usab og asosasyon aron mahimong kabahin sa pagmugna og palisiya.
Gipasabot sa opisyal nga ang Tricycle Modernization Program dili lang alang sa pagmoderno sa mga tricycle kundi alang usab sa pagpalambo sa serbisyu sama sa saktong oras nga kinahanglan sila diha sa kalsada ug igong gidaghanon sa musakay nga mga pasahero.
