BUTUAN CITY – Gitaho sa World Health Organization (WHO) nga natala ang pito ka kaso sa hantavirus sugod sa Abril 1 hangtud sa Mayo 4 samtang anaa sa biyahe ang cruise ship nga MV Hondius.
Duha ang kumpirmado ug lima ang gidudahang kaso, lakip na ang tulo nga namatay.
Sa usa ka pamahayag, gipa-ambit ni Director-General Tedros Adhanom Ghebreyesus nga gikonsidera sa WHO nga ubos ang peligro sa virus sa pangkalibutanong populasyon apan padayon nilang gimonitor ang sitwasyon ug magpagawas ug mga update kung kinahanglan.
Nakig-alayon na usab ang WHO sa mga apektadong nasud ug sa operator sa barko aron matabangan ang mga pasahero ug tripulante.
Lakip sa gihimong aksiyon ang makuting imbestigasyon, pag-isolate ug pagtmabal sa mga kaso, medical evacuation, ug laboratory testing aron matumbok ang hinungdan ug pagkaylap sa sakit.
Ang hantavirus usa ka virus nga nakuha gikan sa mga ilaga ug mamahimong mapasa sa tawo pinaagi sa ihi, hugaw, o laway sa mga niini.
Mamahimo kining maghatud og grabeng sakit sama sa hantavirus pulmonary syndrome o hemorrhagic fever nga dunay kidney complications.
